Minceka ya Vatsonga yi tirha ku endla swilo swo tala

Vatsonga va na minceka yo saseka swinene, malapi ya kona ya tiyile ni mihlovohlovo ya kona yi koka rinoko. Varhungi votala va tirhisa talenta ya vona hi ku teka malapi lama ya minceka va rhunga hi wona.

Malapi ya nga tirhisiwa ku rhunga tirhoko, swikete, tihembe, maburuku na swikipa. Vanhu vo tala masiku lama loko va endla minkhuvo ya vona avaha mbali swibelani ntsena kambe va ya rhungisa minceka leyi vayi lavaku va endla tirhoko, swikipa kumbe tihembe.

Swona swi sasekile swinene hikuva naswona swaha kombisa ku yisa ndhavuko emahlweni kambe varhungi va tirhisa marhungelo ya manguva lama.

Leswi swi tisa nhluvuko erixakeni ra Vatsonga hikuva ku xava swilo leswi i mali nakona varhungi va vuyeriwa navona, va kota ku hlayisa midyangu ya vona hi mali yitsanana yaleyi vayi kumaka.

Varhungi votala va endla ntirho lowu ku yisa ndhavuko emahlweni no endla mali hi kuti tirhisela malapi ya vona.

Mapula Glashy Makoto