Swiambalo swa Vatsonga swa ndhavuko 

Vatsonga va tinyungubyisa swinene hi swiambalo swa vona swa ndhavuko, a va ti tekeli ehansi hi rixaka ra vona. 

Loko u ri wansati wa mutsonga hi ku vona hi ku ambala xibelani, kumbe xikete xa tinguvu leti endliweke hi malapi ya xibelani. 

Emirhini u ambala yele ni vuhlalu bya mihlovohlovo enhan’wini kumbe emavokweni, emilengeni nakona ku ambariwa vusenga. 

Enhlokweni nakona kuna swo khavisa leswi u faneleke ku swi ambala leswi hinkwaswu swi kombisa wansati wa mutsonga wa xiviri. 

Vavanuna va ambala tinjhovo kambe masiku lawa vanwani va teka nceka lowu vavasati va wu ambalaka ni tinguvu va wu tsemisa va endla hembe. 

Vuhlalu hi byona byi sasekisaka swinene eka ndhavuko wa Vatsonga hikuva mihlovohlovo liya yo hambana hambana loko yi hlanganile yi koka rinoko. 

Vatsonga va tala ku timbombisa kahle hi nkarhi wa mikitsikitsi, minkhuvo, micato, nhweti ya ndhavuko, kumbe tihlengeletano to hambana – hambana.

Leswi swi kombisa kahle leswaku Vatsonga va hlayisa ndhavuko hambi leswi vanhu votala va hanyaku xi manguva lawa kambe vona va ha ya emahlweni va veka rixaka ra vona emahlweni.